प्रधानमन्त्री चयनको प्रक्रिया थाल्न कार्यव्यवस्था समितिको बैठक डाकियो

२१ माघ, काठमाडौं । व्यवस्थापिका संसदले प्रधानमन्त्री चयनका लागि चुनावी कार्यक्रम बनाउने गृहकार्य थालेको छ । राष्ट्रपति कार्यालयले संसदबाटै प्रधानमन्त्री चयन गर्न आग्रह गरेको भोलिपल्टै मंगलबारदेखि व्यवस्थाथिका संसदले यसबारे गृहकार्य सुरु गरेको हो । प्रधानमन्त्री चयनको प्रक्रिया निश्चित गर्न मंगलबार दिउँसो १ बजे कार्यव्यवस्था परामर्श समितिको बैठक बोलाइएको छ । समितिले अन्तरिम संविधान र व्यवस्थापिका संसद नियमावली अनुसार बहुमतीय प्रक्रियाबाट प्रधानमन्त्री चयन लागि निर्वाचन कार्यक्रम तय गर्ने बताइएको छ । स्रोतका अनुसार प्रधानमन्त्रीको चुनावका लागि आइतबारदेखि प्रक्रिया प्रारम्भ गर्ने व्यवस्थापिका संसदको तयारी छ । अहिलेसम्म प्रधानमन्त्रीमा कांग्रेस सभापति सुशील कोइरालाको एकमात्र दाबी रहँदै आएको छ । प्रधानमन्त्री चयनको प्रक्रिया शुरु भएपछि कुनै साना दलले उम्मेद्वारी नदिए कोइराला निर्विरोध प्रधानमन्त्री बन्ने अनुमान गरिएको छ । (अनलाइनखबर डटकम)